Dongeng Sunda Kuda Hade Budi

                                                                

Aya maung eukeur mah geus kolot kambah gering,ngalungsar handapeun tangkal kai bari gegerungan. Sato-sato nu kungsi meunang kanyerian ti manehna ngarumpul ngariung nu keur gegerungan tea.

  
Ceuk munding,'Ah siah make gegerungan ! Rek nyambat ka saha ? Moal aya nu nyaaheun ka sia mah...! Satojahat...! 'Munding ngomongna  kitu bari ngagadil nu keur gegerungan.

Nempo kalakuan munding kitu sakur sato nu harita aya di dinya sareuri akey-akeyan.

Jol domba jalu bari ngomong,'Ieu cucungik maung nu kungsi nekuk pamajikan aing teh...? 'jekuk bujur maung teh di teunggar satakerna. Key deui sato nu ngarumpul di dinya sareuri kawas nu galumbira pisan.

  
Banteng mah teu ngomong sakemek,ari jol ka dinya,leye we nincak beuteung maung gering nu geus teu bisa walakaya tea. atuh nu ditincak teh ngagerung satakerna teu bsa ari ngalawan mah. Ger sato-sato sareuri suka bungah. Komo peucang mah sarerina teh bari igel-igelan sagala ku sarerea pada ngeprokan.

Mencek bikang nu ti tadi teu kabagean ngaheureuykeun nu meh sakarat ka hareup tuluy nyidik-nyidik sungut maung. Ceuk mencek,'Paingan jahat euy,ilikan ieu sungutna sihungna mani ranggeteng kieu. Moal salah keur jagjagna geus meakeun puluhan sato. Ku sihung ieu anak anak aing ge digegelna...!'bari ngomong kitu jekek bangus maung teh ditejeh da amarah baheula tacan kabudalkeun.

 'Sakali deui Sakadang Mencek tejeh tah palebah kekemplonganana...!'ceuk embe.

'Make nitah ka kaula,ku sorangan we teunggar,milaur boga tanduk sakitu seukeutna...! tembal mencek.

'Rada sieun keneh kaula mah eta kukuna mani paranjang kitu...!'tembal embe.

'Dasar Sakadang Embe mah sato borangan,ka maung nu geus ngagoler kieu teu wani...! ceuk uncal bari rek ngarinduk ku tandukna nu caragakan. Tapi barang rek jedak pisan,tandukna tikait kana areuy. Jadi boro-boro keuna,kalah manehna ngarigjeug. Atuh ger sato-sato nu araya di idnya nyeungseurikeun uncal.

  
Ku sabab era jeung keuheul uncal ngarindukeun deui tandukna kana punduk maung. Pedah gurunggusuh munding nu deukeut ka dinya rada kabanting. Ceuk munding,'Is na sakadang uncal make ambek ka kaula sagala...!'

  
Ger deui sato-sato sareuri.

Sakadang embe asa panas hatena pedah ku Sakadang Uncal disebut boranngan. Srog manehna ka hareup tadina rek ngagadil beuteung maung. Tapi barang rek jedak pisan,kawasna maung teh ngaleupaskeun nyawa,ngagerung sorana handaruan. Sakadang Embe nu geus kuda-kuda,ngadenge sora kitu mah ujug-ujug ngaleketey leuleus,bru nambru teu bisa hudang deui. saenyana waktu ngadenge soara ngagerung,nu sieun teh lain lain ukur embe nu pangdeukeutna sato-sato sejen ge buriak rek lalumpatan.

  
Tapi sanggeus nempo maung teu cengkat,teu tulus lalumpatanana. Jeung nu tadi rareuwaseun,tungtungna saleuseurian. Komo barang nempo Sakadang Embe rarangkujutan mah nu saeuri beuki rame.

  
Kabeh sato nu aya di dinya ngaheureuykeun maung nu keur sakarat,kajaba Sakadang kuda. Nempo sato-sato sejen galumbira teh manehna mah ukur gogodeg. Ceuk domba,'Ku naon sakadang Kuda kalah ukur gogodeg.,lain tejeh tah Si Belang teh ku suku sampean...! Lain baheula anak sampean di tekuk maung...?

 Tembal kuda,'Kaula mah lain teu ngewa kana kalakuan maung teh. Ngan waktu ieu kaayaan kitu. Manehna keur sakarat sakeudeung deui ge paeh. Kuduna mah sato nu sakarat ulah diheureuykeun. Meureun ceuk batur teh paling wani ka nu rek paeh...'

 Sanggeus ngadenge omongan kuda kitu,sakur sato nu aya di dinya jempe sarta teu lila patinglaleos ka leuweung deui. *** UTUK ***