![]() |
| SEJARAH BABAD PASUNDAN |
Dina Taun 1600'an Jawa-Kulon Dijieun 3 bagian
1.Banten.
Sapupusna Pangeran Muhammad dina taun 1596, putrana nu jenengan Abdul kadir dijungjung lungguh,tapi burey keneh pisan, yuswana tacan sataun. Nya diwakilan ku kapi ramana. Ari dayeuh Banten,jaman harita mah kaitung nu panggedena di pulau jawa. Pangasilan ti P.P. Maluku dikunjalan ka dinya, sarta di dinya ditukeurkeun kana barang-barang kaluaran Hindia - tukang jeung Hindia - hareup.
Jaba tanah Banten asli, anu jadi sawewengkon nya eta tanah jakarta. Ku sabab perdagangan pindah ka Banten, atuh Jakarta teh mundur kacida. Ari gegedenna gelaranana " Pangeran ", diangkat ku Sultan Banten.
Banten jadi dayeuh penggedena di Jawa Kulon (malah ti sapulo Jawa). Rea bangsa-bangsa asing nu ngadon dagang , saperti urang persi, Turki, Arab, Keling,Malayu, Banggala jeung Cina. Ti Hindia tukang aya padagang-padagang anu marawa gajah.
gedong-gedong nu pangalusna nya eta imah Cina, kampungna di luar kota dikubeng ku pager kai. Maranehna dibeulian pedes ti pakampungan jualeun ka urang Portugis atawa iangkeuneun ka nagarana. Maranehna ngajalankeun duit Cina, nu lila-lila dipake di sakuliah pulo Jawa, bangunan ipis, di tengahna diliangan, pangajina 1000 siki kira-kira sarua jeung 10 sen.
Saniskara anu didatangkeun ku bangsa asing, papakean, lawon bodas, perhiasan, porslen, sutra, buludru, payung, kepet, eunteungleutik, emas dsj, dibareuli ku urang Jawa atawa urang pulo-pulo sejen nu daratang ka pulo Jawa ngajualan hasil bumi, tuluy dibawa ka lembur-lemburna.
Kapal-kapal kudu caricing di teluk Banten, da teu aya palabuhan anu enya. Ari sakuriling dayeuh dikuta tembok, diluhurna make mariem.
Ku sabab Ci Banten jadi kacida deetna, caina ngeuyeumbeu bae, malah jadi ngajadikeun ranca-ranca, atuh hawana teu sehat. Ari ti peuting walungan teh reupeuk, nepi ka teu aya parahu nu milir-mudik.
Saban pakarangan dipelakan kalapa, ari imah enclok-enclokan, cara imah-imah kampung ayeuna. Jalan nu lempeng ngan aya tilu, henteu ditimbris, ari keur katiga ngebul, keur ngijih jeblob. Tihang-tihang sok di ukui, hateupna eurih : imahna teu dipantoan, reregan bae anu minangka panto teh.
Bilikna awi dianyam, ari palupuhna marake lampit. Hiji imah weuteuh hargana ngan ukur RP. 2.25,- ngan hiji imah urang pribumi anu ditembok, nya eta bumi Syahbandar. Karaton dijieunna ku kai bae, kitu deui kaputrenan, nu eusina leuwih ti 100 selir. Eta karaton nyanghareupan alun-alun, di dina aya masjid tembok, anu bari sok dipake ngajar agama sarta ngajar maca, nulis jeung basa arab. Aya deui nyanghareupan alun-alun nya eta : pangberokan (mun ti peuting nepi ka 50 jalma nu ngajagana), bumi Mangkubumi, gedogan-gedogan kuda kagungan Sultan jeung gudang pakarangna.
Menak-menak panganggona aralus pisan, sinjangna sutra, malah rea anu disulam ku benang emas. Sakapeung ngaranggo raksukan nu leungeuna ku buludru, tapi biasana tara di raksukan : kopeahna make sorban, rambutna katembong, jeung nyoren keris. Mun arangkat kudu bae di irng ku nu mawa wadah lemareun, kendi, payung jeung samak. Eta menak-menak nya eta kapala kampung. harita dayeuh teh dibagi jadi sababaraha kampung.
Nu baranggawe nyaeta jalma beulian, harita di banten rea, murah pisan, biasana hiji jalma beunang RP.9.-. Ari jariah-jariah sok palasar, ngajualan barang-barang kagungan dunungan istri, (aya 3pasar nu dibuka saban poe),atawa nganteh, ninun, ngabatik. Anak-anak jalma beulian jadi milik dunungan.
Sok rajeun aya nu maling, tapi penjagaan teu sabaraha kawantu tacan aya pulisi.
Mun aya bangsat kacerek, meunang terus dipaehan malah nyerekna meunang ganjaran RP. 1.50,-.
Mun aya kahuruan sok nabeuh tambur, sarerea kudu nukungan.
Awewe-awewe nu kudu mareuman seuneu, ari lalaki kudu ngajaga bisi aya bangsat atawa rampog nu ngarah barang.
Awewe nu ditinggal maot ku salakina, jadi jalma beulian ka karaton, kitu deui anak-anakna. Ku sabab eta barudak teh ngora-ngora sok dikawinkeun, supaya tetep jadi jelema merdika.
kaayaan di pulo jawa sarupa kitu, ayeuna mah ngan kari beja. Da geuning ayeuna mah, hukuman puguh aturananan, dagang jelema dilarang keras aturan ngadegkeun imah, muka jalan jeung sajabana geus nyumpona kana kaperluan jaman ayeuna.
Dayeuh banten beuki lila beuki mundur, kaelehkeun ku Batawi,Samarang, Surabaya jeung sajabana. Antekna mah jadi kampung leutik tur sepi pisan, dicicingan ku tukang ngarala lauk di teluk banten. ngan ayeuna aya keneh patilisan-patilasan nu jadi tanda, yen Banten teh urut dayeuh sugih mukti beurat beunghar, kajojo ti mana mendi, sarta dina taun 1600 jadi kota perdagangan nu panggedena di pulo Jawa.
Nyambung ka dieu...
Tina Babad Pasundan ku.A.C.DEENIK.
